Forma parte do Museo Provincial de Lugo dende xaneiro de 1934 pero, xa dende a creación da institución comeza a recibirse a documentación que constituirá o xerme do futuro Arquivo, en concreto, o 1 de abril de 1932 ingresan no Museo Provincial de Lugo, e daráselles entrada, o día 1 de xullo dese ano, no libro de Rexistro Xeral do Museo cos números 22 e 23 respectivamente, á “Cédula Real expedida el 17 de diciembre de 1754 a favor del Cabildo de la Catedral de Lugo” e ao “Privilegio del Consejo de la Ciudad de Lugo, de alcabalas y sellos, dado en Valladolid en 20 de agosto de 1536”.
A pesar de contar sempre cun espazo propio, no Arquivo e Biblioteca as condicións de conservación non foron en todo momento as máis adecuadas. En 1991, procédese ao traslado dende o local que ocupaban á entrada do Museo ata as actuais dependencias pero, en 2015, dentro xa do lugar do que dispón actualmente o departamento de Arquivo e Biblioteca, volve a efectuarse un novo cambio de localización das unidades documentais do Arquivo que pasan a ocupar os andeis situados ao fondo do depósito da Biblioteca, buscando conseguir un maior control da temperatura e, sobre todo, da intensidade lumínica.
Será tamén, no 2015, cando se inicie a automatización do Arquivo.